MARKUS 16 : 9 - 18 (HUASO HAHEHEON NI JESUS)

Nats  :  MARKUS 16 : 9 – 18

HUASO HAHEHEON NI JESUS

    

A. Patujolo

Adong do tolu bagian Markus 16, ima : 

a). Ayat 1 – 8 :  Taringot tu Haheheon ni Jesus sian na mate ; 

b). Ayat 9 – 18 : Dipataridahon Tuhan Jesus diri-Na tu angka sisean-Na, jala laos disuru angka siseanNa manjamitahon Barita na Uli

c), Ayat 19 – 29 : Hananek ni Tuhan Jesus tu Banua Ginjang. Jadi turpuk on masuk tu horong na paduahon dohot napatoluhon, ima na manaringoti naung hehe Tuhan Jesus sian na mate, jala na hinsat huhut manaek muse tu banua ginjang.

Andorang so turpuk on dipatorang do, na laho si maria Magdalena dohot si Maria ni si Jakobus rap dohot si Salome laho mamiahi bangke ni Jesus. Dung sahat nasida di tanomamn i, di ida nasida do nunga manggulang batu i sian baba ni pintu tanoman i. Dung di ida nasida ndang adong bangke ni Jesus di inganan i, laho ma nasida paboahon naung hehe Jesus tu siseanNa dohot tu si Petrus. Alai dung mulak mangolu Jesus dipataridahon Jesus do diriNa parjolo Maria Magdalena. Jadi laho ma nasida paboahonsa tu angka na mandongani ni Jesus najolo jala na marsak jala tumatangis. Alai ndang porsea nasida, naung mangolu. Jala dohot ma sidua halak on mamaritahon dohot manghatindangthonNa i, alai tong do ndang porsea nasida.

B. HATORANGAN NI TURPUK

Ayat 9 – 13,

• Hatorangan ni si Markus, pabotohon angka parompuan gabe saksi tu haheheon ni Jesus (Markus 15 : 41), adong do angka parompuan na sai paihut-ihut Jesus laho manangihon huhut marnida ulaonNa, jala huhut manghobasi Ibana dohot angka siseanNa). Dung tartangkup Jesus, anggo angka siseanNa i nunga marserak nasida, ala mabiar hona tangkup muse. Alai anggo si Maria Magdalena, si Maria ni si Jakobus, dohot si Salome torus do diihuthon nasida hamamasa tu Jesus, lumobi sian mamungka dalan panaonNa i, sahat tu peristiwa hamamateNa, sahat tu na diturunhon Ibana sian hau pinarsilang i ro di na paihut-ihuthon sahat tu tu dia bangke ni Jesus di peakhon. Angka parompuan i, torus do ditatap jala sude proses penyiksaan i diihuthon nasida do sahat tu na mate Jesus (Markus 15 : 40). 

Panatapon ni angka parompuan i patuduhon holong ni roha nasida, holong ni roha i do na mangonjar parompuan i mangihuthon peristiwa Jesus, jala ndada holan na manatap-natap, alai nionjar ni holong ni roha nasida dohot huhut manuhor miak tu bangke ni Jesus, ima tanda holong n iroha nasida tu Jesus (Marukus 16 : 2). Habaraniaon ni roha ni angka parompuan i laho tu tanoman i laho marnida bangke ni Jesus, hape dang disi be Ibana, ala nunga mungkap tanoman i. 

Peristiwa on patuduhon na ingkon torus do hita mardalan laho mencapai tujuan ni parngoluonta. Unang mundur, molo pe adong taida di jolo songon na adong mambahen hita mabiar, isarana songon na adong batu na balga laho mambahen hita ragu laho mangalangka, nang boi do ala hahipason, nang alani parhepengon na mambahen hita lomos, alai sian barita ni parompuan on, di jajari hita asa “maju terus pantang mundur”. Diarahaon surusuruan i do parompuan i tu rencana pardalanan selanjutna dung marnida na masa di tanoman i. Pardalanan i, ima paboahon huhut pasadahon sisean i muse asa marpungu nasida di Galilea. Sasintongna nunga dilumbahon Jesus hian na joloananNa nasida di Galilea, dung hehe Ibana sian na mate (Markus 14 : 18). Hata on, ima hata parpudi sian Jesus andorang so di tangkup Ibana di Getsemane peristiwa hahomion ni Debata do na terjadi marhite haheheon ni Jesus.

Ayat 14 – 16,

• Disada tingki rap mangan ma Jesus dohot angka siseanNa di sada inganan na so apala dipaboa goarna (tontu naung somal do i dibolus nasida rap dohot Jesus), dipangke Tuhan Jesus ma i tingki laho pataridahon dohot patandahon diriNa tu nasida na sampulu sada sisean. Dipaingot jala dipinsang Jesus do nasida alani ganggu dohot jogal ni roha nasida na so olo porsea, di angka na mamaritahon haheheonNa sian na mate. Boasa ndang porsea nasida di haheheon ni Jesus i ? Ala lupa nasida di pandohan ni Jesus, paboa na hehe do Ibana di ari patoluhon; dung i, hinorhon ni na mabiar nasida mida halak Jahudi dohot panggomgomi di tingki i, jala muse dohot na so didok roha nasida boi jolma “mulak mangolu” sian na mate, atik pe nian hea do diida nasida dipangolu Jesus naung mate, songon boru ni si Jairus. Alai dung dipinsang Jesus nasida di jogal ni roha nasida i, jala diida nasida Jesus dijolo manang di lambung nasida, ndang be ganggu roha nasida di haheheon ni Jesus, gabe porsea ma nasida di Jesus dohot di haheheonNa. Ndang pola be dialusi sisean i hata ni Jesus, ai pintor ihut do nasida di hata ni Jesus na tarbarita i, i ma parsuruNa di nasida, songon na tarsurat di ayat 15  : “Laho ma hamu tu liat portibi on, jamitahon hamu ma barita na uli i tu nasa na tinompa”.

• Dison diparentahon do “manjamitahon” Barita na Uli i, ndang songon na di

Mateus 28 : 19 (mandidi tu bagasan Goar ni Ama, Anak dohot Tondi Parbadia). Alai boi do antusanta i, ala Buku Markus do na tertua sian na tolu nari. Jadi boi dohonon na ringkas do isi ni Markus alai nunga manghamham sudena pangantusion sian na tolu buku evangelium. Jadi marhite pandohan i dilehon Jesus do tu siseanNa i tugas “Marbarita Na Uli” / “Pekabaran Injil” na mansai balga tu sandok portibi on, jala nunga dohot disi tugas “pandidion” songon na di ayat na mangihut (ayat 16) didok do: “Na porsea jala tardidi, dapotan hangoluan, alai na so porsea i, hona uhum do!”. Ndang tarsirang haporseaon sian pandidion. Na marlapatan, ndang boi halak mandok porsea ibana, hape ndang jolo tardidi, manang jolo tardidi alai ndang porsea ibana di Debata Sitolusada i. Jadi sai hot do haporseaon dohot sakramen pandidi on i.

• Marhite on laos ondolhononhon do, molo dung tardidi (manang ise pe tu bagasan Goar ni Debata Sitolusada i), sah do i jala ndang boi muse tardidi mangulahi (baptisan ulang). Jadi poda haliluon (ajaran palsu) do i, molo adong huria manang kelompok na mangajarhon pandidion paduahalion (diulang). Asing ni sakramen pandidion, adong dope sakramen sada nari na ingkon siradotan ni angka na porsea, i ma Ulaon na Badia manang Parpanganon na Badia, na dua on do Sakramen di sandok Huria Protestan, ai i do na langsung diparentahon jala di dok Jesus asa “diulahon” siseanNa i di na mamaritahon manang di na manjamitahon Barita na Uli i nasida.

Ayat 17 – 18,

• Ndada holan parenta ana dilehon Jesus tu angka siseanNa i alai diperlengkapi do nasida dohot angka hagogoon na mangasahon Goar ni Tuhan Jesus, i ma : 

1). Boi nasida pabalihon angka sibolis dohot manghatahon angka hata na imbaru na marhagogoon mangurupi nasida laho manjamitahon dohot mamaritahon Hata ni Debata. 

2). Boi nasida manaluhon angka na marbisa songon angka ulok na olo manurbing, boi jumputon nasida, so pola mangkorhon parmaraan tu ngolu nasida, laos i tung sura pe adong na painumhon rasun tu nasida manang tarsor tarinum nasida, ndang pola mahua nasida, ai diramoti Tuhan i do nasida, asa unang marmara. 3). Boi nasida pamalum angka na marsahit, marhite na mangampehon tangan di bagasan “Goar ni Jesus, gabe malum ma angka na marsahit i (patudos, Ulaon Apostel  8 : 7 ; 2 : 4 ; 28 : 3 – 8 ; 28 : 8 ; 19 : 20).

Ayat 19 – 20,

• Mansai sederhana do pamaritahonon ni Evangelium Markus on taringot tu hananaek ni Tuhan Jesus tu Banua Ginjang. Holan di dok di ayat 19: “Asa anggo Tuhan i, dung manghatai Ibana dohot nasida, tarhinsat ma tu Banua Ginjang, laho hundul tu siamun ni Debata”. Na umporlu di Evangelium Markus on, i ma manghatahon angka ulaon ni Tuhan Jesus di tano on secara ringkas padat, jala dung sidung jala singkop sude ulaonNa i diulahon jala dipasahat tu angka siseanNa i, manorushon dohot pahembanghon ulaonNa i, jala dang adong be na so diulahon Ibana, nunga tingkina be manaek Ibana tu Banua Ginjang laho hundul tu siamun ni Debata. Dasar-dasar pangulaon ni angka sisean di pudian ni ari nunga dilehon Tuhan Jesus be secara lengkap, jala sitorushonon nasida ma i tu Huria, asa Huria i manorushon i muse sepanjang zaman. Molo taparbandingkon Barita “Hananek ni Tuhan Jesus tu Banua Ginjang” dohot angka Evangelium sinoptik na dua nari, asingasing do penekananna be (patudos, Mateus 28 : 16 – 20 ; Lukas 24 : 50 - 53), alai rap manghatindangkon do, paboa Tuhan Jesus tutu situttu do hinsat jala manaek tu Banua Ginjang.

C. SIPAHUSORHUSORON

• Tahaporseai ma hananaek ni Tuhan Jesus tu siamun ni Debata. Ndang adong be na ummaol sian na manghaporseai hananaek ni Tuhan Jesus tu Banua Ginjang. Ndang masuk angkal dohot di pingkiran ni torop jolma taringot tu hananaek ni Tuhan Jesus. Ai godang do sungkunsungkun na didok ni jolma i, na boi “habang tu banua ginjang,” so manang na adong habongNa, manang masin penggerakNa di pamatangNa i. Dung i muse tudia jala dompak dia ma Ibana habang, ai na sai lambas parlangitan (jagad raya ) on. Hinorhon ni i do torop jolma ndang porsea di Tuhan Jesus manang gabe murtad maninggalhon Debata, ala ndang tarjalo utokutokna angka na marpardomuan tu ngolu ni Tuhanta i. Memang i do, ndada angka na marpardomuan tu ngolu ni Tuhan i. Memang i do, ndada utokutok parjolo sipangasahononhon, alai haporseaon do dohot mamereng angka ulaon ni Tuhan Jesus, na patuduhon Ibana do Debata jala Sipalua manisia. Angka ulaon-Na i ma patuduhon tu hita dohot angka haholongan na pinatupa-Na i do papatarhon na Debata situtu do Ibana jala sada do Ibana dohot Debata, Ama-Na i. Jadi umbahen na ro pe Ibana tu portibi on, asa malua do angka na porsea di Ibana. Boha ma asa malua jolma sian dosana be, i do na niula ni Ibana saleleng di portibi on Ibana, jala dung singkop sude i, mulak ma Ibana tu ingananNa hian, i ma di lambung ni Ama i di Banua Ginjang.

• Haporseaon do na ringkot tusi, ndang utokutok manang ilmu pasti. Jolo haporseai ma, dung i idaonmu ma bukti ni na hinaporseaanmi. Sintong jala tutu situtu do Tuhan Jesus Kristus manaek tu Banua Ginjang. Alani ma, baritahon ma Barita Nauli i, ima Tuhan Jesus naung manaek tu Banua Ginjang i, dohot hamamate dohot haheheon tu Banua Ginjang. Jadi borhat ma hita tu sandok portibi on ; na marlapatan ingkon sude hita gabe parbarita nauli masa kini, songon ruas ni huria i, manang aha pe ulaonta dohot kedudukanta di masyarakat. Tontu jumolo ma Keluarga na gabe lingkungan manang lembaga terkecil di dunia, gabe “dapur” sibaritahonon ni angka na porsea; disi ma ama, ina, manarihon (marbarita nauli) tu ianakonna. Jadi termasuk parbarita nauli do hita molo sai tapatuduhon parange na denggan di sandok parsaoranta di rumah tangga, ditongatonga ni huria. Molo tapataridahon i marhite pambahenan na de nggan jala tarpuji maradophon na humaliang hita asa dapotan pasupasu ma hita sian Tuhan. Jadi tong tapangke ma angka talenta na nilehon ni Debata di hita laho pararathon Bariota Nauli, ima haluaon na pinatupa ni Tuhan Jesus.

• Tuhan i do na margogoihon hita di angka ulaonnta songon angka sisean ni Jesus i, ima marhite naung saor Tondi Parbadia di nasida manigor dibagasan las ni roha dohot gogo do nasida mamaritahon Barita na Uli i. Asa nang hita naung manjalo haluaon na sian Kristus i, jaloonta do Tondi Parbadia na margogoihon hita. Molo tapingkiri dohot tenang jala tabereng tu pudi ni ngolunta dohot pardalanan ni ngolunta sian mulai dung sorang hita tu portibion, nda godang angka halongangan disi ? gabe boi hita di stsatus i nuaeng on ? nda dipargogoi Tuhan i do hita di tingki dakdanak ?, marsingkola, dohot sahat na tu na marrumatangga ? Ndada holan sahat disi ro di salelenglelengna do ramotanNa hita. Alani i, di hananaek Tuhan Jesus tu Banua Ginjang laho patoguhon haporseaonta, Amen.

Syaloom

Teriring Salam & Doa :

Pdt. Martahi Oloan Siahaan, STh, MM